【Emily】「轉行」拍片 接鶴嘴郊遊任務 阿熙影「垃圾灣」宣傳淨灘行動
【明報專訊】民主黨主席羅健熙及多名南區黨友辭去區議員職位,但阿熙有新嗜好及技能,「轉行」做咗攝影師及剪接師,同黨友拍攝郊遊介紹南區風物,而拍片主要目的係幫環團及社區團體,宣傳喺12月5日(周日)舉行嘅鶴嘴「垃圾灣」淨灘行動。
世界自然基金會香港分會(WWF)曾就「垃圾灣」做抽樣調查,話估計呢個小石灘垃圾量達185公噸,當中塑膠物料佔近九成,有團體話雖然近年情况改善,但垃圾堆積問題依然嚴重,遂發起義工活動清潔海灘。
羅健熙於是做攝影師,由黨友嚴駿豪及陳欣兒做主持,帶大家由鶴嘴道出發行去垃圾灣,沿路風光唔錯,陳欣兒話試過個幾鐘就行完,但到咗垃圾灣情况就有啲唔同,灘上有膠桶、魚網、棚架、建築廢料等。嚴駿豪話相信呢啲垃圾係水流冲埋岸。阿熙就話食環署已有定時清理,諗住應該唔算太惡劣,結果令佢大開眼界!
唔同環團有定期搞清潔海灘活動,歡迎市民參加,而阿熙佢哋宣傳嘅活動喺12月5日舉行,上晝9點喺黃竹坑出發,詳情可瀏覽網址(bit.ly/cleanhoktsui)。