【Emily】梁卓然做法官？ 司法機構唔答
[2021.09.04] 發表
【明報專訊】前刑事檢控專員梁卓然(圖)舊年辭職，過咗9個月，有報章引述消息話佢下個月會出任高等法院暫委法官，為期6個月，更係由終審法院首席法官張舉能拍板。司法機構噚日話唔會評論有關個別委任人選嘅傳聞，終院首席法官可以根據《高等法院條例》第10條，委任有資格嘅人做高院原訟法庭暫委法官，有消息就會刊憲公布。
高院暫委法官月薪都有30幾萬，過往唔少刑事檢控專員都係咁成功「做官」，包括麥偉德、薛偉成、楊家雄等。最近梁卓然被翻舊帳，喺馬家健冤案中，佢係當時嘅刑檢專員。
上訴庭最後裁定馬家健上訴得直，撤銷企圖販毒罪同無罪釋放，判辭仲批評控方放棄追究較重罪責嘅人。
同鄭若驊唔夾 辭刑檢專員
梁卓然1995年加入律政司做刑事檢控科檢察官，2015年後獲委任為資深大律師，2018年起做刑檢專員，任內處理過唔少大案，包括七警案、重奪公民廣場案、佔中九子案等；舊年佢話同鄭若驊意見不合，提出請辭。
更多港聞
【Emily】林鄭到中學聽施政報告意見 學生望「貓紙」讀問題 包括十四五規劃
【明報專訊】特首林鄭月娥繼續就《施政報告》聽意見，噚日去咗保良局嘅中學，同約800名來自16間學校嘅學生透過視像及親身交流，喺歷時約一小時嘅... 詳情相關新聞
