【Emily】西九首席財務總監離職 高層9缺4

[2021.08.19] 發表

【明報專訊】近期頻繁出現人事變動嘅西九文化區管理局再有管理層離職。西九管理局證實，已批准首席財務總監馮潔儀噚日起離任。翻查資料，連同馮潔儀，西九管理局行政總裁轄下嘅9名高層人員，已有4個職位出現真空，面臨「9缺4」局面。

根據西九管理局網頁，馮潔儀負責財務規劃及會計、投資、融資、庫務管理同外部審計，亦負責環境、社會同企業管治方針及匯報工作。

西九管理局話唔評論個別員工個案，話將公開招聘首席財務總監繼任人選；又話管理局擁有穩健嘅人力資源管理系統，任何員工離任或休假都唔會影響運作，財務事務處會一如既往喺高級行政團隊帶領下如常運作。

西九管理局自前行政總裁栢志高上年11月離任後，有唔少人事變動，包括表演藝術總監方美昂今年4月宣布離職、首席工程總監司徒澤民上個月亦離任。根據西九管理局架構，行政總裁轄下原設9名高層人員，至今有4個職位仍未聘得人選，包括副行政總裁、首席業務發展總監、首席工程總監同首席財務總監。

更多港聞

【明報專訊】政府推出「與香港同行」計劃，等參加學生有機會做影子官員，近日唔少司局長都有講吓影子局長嘅一日工作情况，好似公務員事務局聶德權噚日... 詳情