【Emily】區議員離職 物資派街坊
[2021.07.10] 發表
【明報專訊】政府傳出將DQ區議員兼追收薪津後，聞風辭職嘅區議員數目連日來如籌款數字，不斷攀升。部分辭任者開始執拾議辦，並將物資送贈街坊。大埔區前議員任啟邦就搬出一堆物貨畀街坊認領，包括數個USB喇叭、大量U型助行架及手杖，仲有食飯枱及大批文件夾。深水埗區嘅冼錦豪問有冇街坊打算買蘋果電腦，話佢有部上年先買嘅新機想轉售，開價1.4萬元，目的係攞番少少錢，用嚟幫補房署3個月議辦租金及支付同事遣散費。
冼錦豪賣電腦 幫補租金遣散費
部分議員服務社區多年，今次要提早離場，依依不捨。大埔區嘅劉勇威就喺facebook話，兩年過去，回顧番佢哋跟進嘅兒童設施大受歡迎，但就唔能夠以議員身分，見證跟進多年嘅隧道升降機落成喇。佢話一路走來，無負大家所望，無愧於心。荃灣區嘅潘朗聰就話講再見原來係咁難，感謝呢幾日街坊搵佢或短訊慰問，「搞到我不時都眼濕濕」。
更多港聞
相關新聞
