【Emily】怡和送禮鼓勵打針 包括3架Benz

【明報專訊】商界推出大抽獎鼓勵市民接種新冠疫苗浪接浪，怡和集團噚日宣布送出總值1000萬元嘅禮品大抽獎，包括3架平治房車，同埋適用於中環置地廣場、文華東方酒店、美心集團、惠康、萬寧、宜家家居、必勝客、肯德基等嘅購物、餐飲同埋住宿禮券，相關禮品會透過香港總商會主辦嘅社區抽獎活動送出。抽獎活動喺7月至9月舉行，參加要求係：所有年滿18歲或以上、持有有效香港身分證嘅香港居民，喺報名參加抽獎前已喺香港接種兩劑新冠疫苗，詳情稍後公布。

怡和控股有限公司副行政總裁及香港區主席彭耀佳話，相信建立全民群體免疫力係令香港早日回復常態嘅最佳途徑。怡和集團亦有推出鼓勵員工接種疫苗嘅措施，包括畀員工喺工作時間接種疫苗或陪同年長家庭成員接種，以及額外兩日嘅有薪疫苗假期。

另外，宏利香港都計劃送出100份總值100萬元嘅「保費代用劵」畀接種兩劑疫苗嘅年滿18歲香港居民抽獎，呢啲代用劵可用以支付新買或現有保單保費，適用於所有宏利人壽、健康及儲蓄產品。