【Emily】眾籌未如理想 洪駿軒棄選舉呈請上訴
[2021.05.08] 發表
【明報專訊】高院早前裁定民主黨觀塘區議員洪駿軒非妥為當選，佢為咗上訴，想眾籌100萬，不過反應唔係咁理想，加上律師話勝算唔樂觀，所以佢撤回上訴申請，隨即喪失議員資格。佢喺facebook形容，可以成為「香港最後一批代議士」感到光榮，好感謝4203個投票畀佢嘅街坊信任佢，抱歉自己未能完成當初許下嘅4年承諾。
洪駿軒話，失去議席唔等於失去民心，「有些信念是政權無法撼動」，希望各位仍然係議員嘅同路人繼續堅持。而佢早前眾籌所得嘅15萬蚊，會全數用於支付訟費。
另外，政府噚日刊憲九龍城土瓜灣南、荃灣馬灣、西貢軍寶選區各有一個民選議席出缺，原議員分別係被判定非妥為當選嘅李軒朗，同埋請辭嘅譚凱邦、黎銘澤。
已離港嘅李軒朗喺fb話，雖然冇議員喺當區，但社區每日運轉，仍有街坊搵佢查詢地區事務。佢話喺外地嘅日子，唔止一次夢到喺區裏面巡視兼散步。佢同樣對未能做完全屆任期感到抱歉。
更多港聞
相關新聞
