【Emily】李慧琼話離題 內會熄田二少咪

【明報專訊】泛民總辭後議會變得平靜，不過噚日就發生建制派議員講嘢被熄咪嘅畫面。實政圓桌田北辰噚日喺立法會內委會發言時被指離題，同內會主席李慧琼(Starry)疊聲發言，最終被熄咪；田二少當時仍未放棄，喺位大嗌講多幾句，最後自行行出會議室。其實早喺上個月嘅內會會議，田二少想討論東鐵線信號系統，同樣被Starry提醒離題。

話說港鐵八折乘車優惠即將完結，田二少噚日喺內會上話，好多市民希望計劃延長3個月，希望Starry同政務司長張建宗反映。Starry諗都唔使諗，立即「落閘」，話呢個環節唔能夠就住個別政策範疇表達意見；但田二少急住咁話「你聽我講先」，解釋今個月無鐵路事宜小組委員會，交通事務委員會議程又排到滿晒。

Starry雖然連講幾次唔好意思，話明白田二少好關心呢件事，但最終企硬將田二少熄咪，叫佢喺其他場合跟進。