【Emily】聽施政報告瞓着 曾國衞：食咗藥
[2020.11.28] 發表
【明報專訊】政制及內地事務局長曾國衞周三聽特首發表施政報告時，畀傳媒影到佢難敵睡魔，噚日喺記者會主動解畫，話當日因為扁桃腺炎食咗抗生素、消炎藥，醫生建議佢休息，但佢認為作為主要官員，要全力支持特首發表施政報告，冇時間休息，當日狀况比較差，表示抱歉，「有啲唔好意思喇」。
話醫生叫唞 為全力支持特首唔休息
曾國衞話冇向特首解釋，特首都冇問佢；被問到會唔會解釋番，佢話唔係咁大件事，「在座各位冇乜邊個未試過啦，身體不適、睇完醫生食咗藥比較睏乏，咪咁囉；食完藥睇完醫生，咪好番囉，咪繼續做嘢囉。雞毛蒜皮都去煩特首，特首真係好唔得閒喇」。
至於日前被影到喺特首答問大會上搖晃身體，佢就話因為頸椎有啲退化，如果會議時間長，都會做頸部運動紓緩疼痛，所以擰來擰去。
政務司長張建宗噚日上港台英文台節目，被問到建制派議員喺特首發表施政報告時買大閘蟹、瞓着，張建宗承認情况唔理想(not satisfactory)；至於點睇曾國衞瞓着，張建宗就話唔認為佢係故意，可能因為太攰，因為曾國衞成日都要出差、亦好多嘢做。
更多港聞
【Emily】Na Can最後一天 鄧經理做大組長 帶校友Dem beat
【明報專訊】中大新亞書院學生餐廳噚日最後一日營業，校友會原本諗住搞歡送晚會，但因為疫情取消，改為校友會同餐廳鄧經理、老員工一齊fb Live... 詳情相關新聞
