【Emily】被問選特首即咳 葉劉：返立會實際啲
[2020.11.21] 發表
【明報專訊】新民黨主席葉劉淑儀同立法會前主席曾鈺成，噚日喺「灼見名家周年論壇暨6周年慶典」討論「香港政爭」，主持人問葉太明年會唔會參選特首，葉太即時咳咗一聲，仲話「即刻要咳呀，我都係返去開(立法)會實際啲」。之後台下觀眾問曾鈺成如果𠵱家係特首，會點處理局勢，曾鈺成即刻笑笑口話：「如果我係特首，我一早辭咗職嘞。」
曾鈺成：我係特首一早辭職
葉太話自從民主派早前總辭，立法會回復正常，「前所未有咁寧靜」，又話議員「衣冠要莊嚴」，亦要有番一套議會語言。葉太話建制派角色功能轉變，受到前所未有嘅壓力，未來會以事論事，負起監察者責任；又提到愛國係從政同做公職嘅先決條件，但香港從政報酬比從商低，又被人「起底」改花名，「要有番咁上下面皮」。
曾鈺成就話，如果話佢過去做立法會主席時處事太寬鬆，令議會墮落，佢「難辭其咎」。佢覺得愛國係治港者先決條件，但治港者同樣要有能力、承擔同埋選民支持。至於現屆政府表現值幾多分，曾鈺成就唔評分，但佢覺得處理香港當今問題需要具政治智慧同技巧嘅政治人才，而佢記得特首林鄭月娥講過政府官員能幹，但唔係政治人才。
更多港聞
【Emily】泛民曾劣評 法律顧問馮秀娟下年退休
【明報專訊】立法會法律顧問馮秀娟喺去年逃犯條例爭議，同今年內會停擺風波，畀民主派批評「偏幫」建制派。Emily聽聞，作為立法會法律事務部第一... 詳情
【Emily】新城堡開幕 迪士尼15周年派15,000門票
【明報專訊】今年係香港迪士尼樂園開園15周年，為感謝粉絲嘅支持，迪士尼搞咗個「FUN 享奇妙夢想」大抽獎，合資格嘅香港居民可以上網報名參加，... 詳情相關新聞
