【Emily】辦聯署籲德制裁 滑鼠娘娘被建制派狙擊
[2020.10.03] 發表
【明報專訊】被網民稱為「滑鼠娘娘」嘅鄺頌晴(圖)𠵱家喺德國讀書，佢早排喺當地發起聯署，呼籲德國聯邦議會制裁侵害人權嘅中國官員，以及促請德國政府向香港發出旅遊警示等。佢呢個行徑惹嚟建制派及親中傳媒狙擊。《文匯報》噚日報道就搵嚟人大代表陳曼琪等人，話鄺頌晴有可能違反《港區國安法》第29條第4款，即係對中央及特區政府進行制裁、封鎖等敵對行為，又話要追究。
鄺頌晴之前同民間團體反對被網民稱為「網絡23條」嘅《2014年版權(修訂)條例草案》，因而成為網紅。佢喺德國提出聯署，其中一個原因係有12名港人被扣內地，而唔少示威者亦坐緊監，呼籲集齊5萬個簽名，要德國國會開聽證會討論香港情况。公然對抗政權有風險，鄺頌晴前日中秋節就喺facebook上傳一張月亮相片，並引《水調歌頭》，指人有悲歡離合，月有陰晴圓缺，此事古難全；但願人長久，千里共嬋娟。然後留言話：「很快會再見，很快會團圓。要真心相信。」
更多港聞
【Emily】駱惠寧前日探訪 劏房男曾捐近百萬內地抗疫
【明報專訊】前日中聯辦主任駱惠寧「出巡」探訪咗個深水埗失業劏房戶，佢話𠵱家淨係打散工，妻女都要返湖南生活。有眼利嘅市民發現，呢名劏房戶今年... 詳情
相關新聞
