【Emily】左報話潛逃 鄭家朗現身「闢謠」

[2020.08.22] 發表

【明報專訊】《港區國安法》實施後，《文匯報》同《大公報》喺7月都報道，話前香港眾志副主席鄭家朗已經「潛逃」外國。不過，鄭家朗噚日出席一個關於通識書刪改內容嘅記者會，即時擊破佢「潛逃」嘅傳聞。佢承認曾經離港，但唔係潛逃。

以教育團體「教育野」發言人身分出席記者會嘅鄭家朗噚日回應有關報道，承認因為家庭同個人事務，曾經離港一段時間，但因為涉及屋企人私隱，唔方便透露詳情。佢又話，文匯大公話佢潛逃，但自己𠵱家身處香港，「所以我就唔係潛逃喇」。

前眾志秘書長黃之鋒都喺facebook回應事件，批評《文匯報》今個禮拜仲無中生有，話鄭家朗已經流亡英國，「實在九唔搭八」。佢又話，對於將香港民主派政治人物離港，同「流亡」、「走佬」劃上等號嘅「文匯大公邏輯」，「實在覺得相當可笑」。

更多港聞

【明報專訊】政府早前宣布全日禁堂食，之後因為社會反彈太大而收回。勞福局長羅致光（CK，圖）噚日接受港台節目《鏗鏘說》訪問，佢話做決定前兩三周... 詳情