【Emily】機械人駐試場幫DSE生打氣

[2020.04.22] 發表

【明報專訊】中學文憑試(DSE)星期五開考，考生正式入試場前，通常都係拎住雞精筆記，把握最後時間再記吓背吓，現場瀰漫緊張氣氛。試場學校之一嘅天主教慈幼會伍少梅中學就搵咗3個智能機械人做小幫手，喺試場外「巡視」，提醒考生夠鐘入試場；佢哋又會向考生提供酒精搓手液，同埋講吓鼓勵說話，散發正能量信息，幫考生打氣。

該校助理校長陳智偉(Ricky)話，喺部分老人院同酒店都會見到呢類智能機械人，負責巡房同送餐，今次學校添置一個，連同兩個借用嘅，3個機械人會喺試場外「駐場」。

「巡視」提醒考生夠鐘入試場

Ricky話今年考生都幾慘，經歷DSE延期，去到真正考試當日，又要喺學校完成一系列防疫程序，整個過程、氣氛都好冷漠，希望考生到時見到機械人周圍行，都會稍稍放鬆心情、開心吓。

學校：希望引起學生學STEM興趣

機械人完成DSE「駐場」工作後，仲有另一任務。Ricky話希望藉機械人，引起學生學STEM嘅動機同興趣，好似學寫程式等等，一齊改良機械人或諗吓唔同發明。