【Emily】建制泛民互罵無恥 周浩鼎躺槍
[2020.04.18] 發表
【明報專訊】立法會內務委員會噚日會議仲未選出主席，泛民、建制就公民黨郭榮鏗應唔應該繼續主持主席選舉，再度唇槍舌劍。民建聯周浩鼎無發言，不過都被拉落水，躺着也中槍，畀工黨張超雄話佢先至係最無誠信。
事緣工聯會陸頌雄先批評郭榮鏗聲稱畀議員充分發言，實質係想阻擋政府法案，斥郭「誠信有問題」。民建聯葛珮帆又話郭榮鏗濫權、霸主席台，「公民黨以為無恥就無敵」。
張超雄：周私通梁振英 最無誠信
接住發言嘅工黨張超雄就話，民建聯畀人叫「禮義廉」，竟然會話「無恥就係無敵」，話最無誠信嘅係民建聯周浩鼎，曾「私通」時任特首梁振英竄改調查UGL事件嘅會議文件。
公民黨陳淑莊之前腦部生瘤，工聯會麥美娟曾被指用粗口鬧特首林鄭月娥。佢哋噚日就以此互罵，陳淑莊叫麥美娟「唔好用粗口鬧我就得」，麥美娟話「我驚你身體唔好」，陳回應「你放心，我身體好好。唔好歧視身體曾經唔好嘅人，你返去睇吓書，咁係違反歧視條例」。
究竟點樣破解內會困局？民主黨嘅尹兆堅就用番郭榮鏗之前嗰句話建制派「又蠢又懶」，話之前郭榮鏗都已經提過佢哋，「一早同你講咗啦，(民建聯)李慧琼退選(主席)咪搞掂囉」。
更多港聞
【明報專訊】司法機構噚日宣布委任周慧珠、翟國怡、林澤銘、楊綺娜、蕭志韻、龍軍庭、屈麗雯、余俊翔及施祖堯為常任裁判官。有關任命係由行政長官根據...
詳情
相關新聞
