【Emily】「好市民」：我未怕壞人 警察有槍都驚?

有曾獲好市民獎嘅市民傳相片畀羅健熙，話佢哋作為平民，冇受過專業訓練都未怕對付壞人，質疑點解警方有訓練有槍，喺元朗襲擊當晚都會驚而要等增援。（facebook圖片）

【明報專訊】元朗周日(21日)發生白衣人襲擊市民事件，警方喺接報後逾半個鐘先有支援隊伍到場，其間有兩名軍裝警員喺現場，但聲稱因為無足夠裝備、警力而未有介入，處理手法引起公眾不滿。有自稱曾獲頒好市民獎嘅市民就質疑，普通市民都未怕對付壞人，「你們警察有訓練有槍，都話驚？要等增援？」

民主黨副主席羅健熙噚日上載照片，指有曾獲頒好市民獎嘅人傳相畀佢，有一張影住好市民獎獎狀，下款係「好市民上」。該市民話，自己作為普通市民、未受過專業訓練，都未怕對付壞人，「你們警察有訓練有槍，都話驚？要等增援？」該市民要求警方盡番責任，保護市民生命財產安全，捉拿暴徒歸案。

根據警方網頁資料，「好市民獎」由警察公共關係科主辦、香港總商會贊助，撲滅罪行委員會全力支持，每年頒獎兩次，每名得獎者可獲發獎狀及3000元獎金。由1973年至今，已有逾4000名市民獲獎。