古蹟辦倡增3法定古蹟 嘉咸街唐樓擬列三級

有保育團體關注市建局重建範圍嘅嘉咸街26A至C號戰前唐樓（見圖）只會拆剩外牆，促請古諮會評級。據古蹟辦文件，建議將呢3幢唐樓列為三級歷史建築。（中西區關注組facebook圖片）

【明報專訊】古諮會下周四(13日)開會，據古蹟辦提交嘅文件，除咗建議增列3幢新古蹟(東區嘅黑角頭石刻、灣仔北帝廟「玉虛宮」、上水金錢味峰侯公祠)，較受關注係喺市建局重建範圍嘅嘉咸街26A至C號唐樓評級。早前有保育團體發現呢排三連棟嘅戰前唐樓被圍咗棚架，擔心會開始拆，並且反對市建局只肯保留唐樓嘅建築立面，拆剩幅牆，故要求古諮會評級；據最新文件，古蹟辦建議評為三級歷史建築，並推斷三幢唐樓建於1922至1924年間。

發展局：評級不影響使用及發展權

Emily喺5月問過發展局，局方話古諮會秘書處3月26號收到中西區關注組要求就嘉咸街唐樓評級，但強調評級只係行政措施，唔影響建築嘅業權、管理權、使用權同發展權。另外，古蹟辦亦建議將香港大學校長寓所列為一級，有過百年歷史嘅尖沙嘴前賈梅士學校就列為二級。

新建議嘅3幢古蹟來頭唔細，好似大家熟悉嘅灣仔北帝廟「玉虛宮」，已有逾150年歷史，由3幢建築組成，拜祭漁民供奉為海神嘅北帝，旁邊有公所同學校，可謂早期區內發展嘅歷史地標。味峰侯公祠於18世紀末興建，用作祭祖同處理宗族事務。黑角頭石刻係市民去年發現後通知古蹟辦，體積同東龍洲全港最大石刻差唔多。

更多港聞

籲周日上街反修例 小店紛紛休市

【明報專訊】民陣周日辦第三次反對修訂《逃犯條例》遊行，多間小店近日紛紛宣布當日休市，呼籲大家遊行。有小店話shopping幾時都得，但除咗關... 詳情

機會來了 港人可為系外行星命名

【明報專訊】近年天文學家發現咗太陽系外有唔少好似地球咁嘅岩石行星，國際認可機構、負責命名各種星體嘅國際天文聯會（IAU）為紀念成立百周年，將... 詳情