容海恩走私囡囡入會議室
[2019.05.01] 發表
【明報專訊】《逃犯條例》修例法案委員會噚日舉行第二次會議，氣氛緊張，主持會議嘅民主黨涂謹申因規程問題，其間暫停會議10分鐘，新民黨容海恩(Eunice)突然趁呢段空檔，帶埋今年初出世嘅B女入會議室探望「長輩」，一班建制派女議員隨即蜂擁而上打卡，連民主派會議召集人毛孟靜都大讚B女得意、「眉目如畫」，會議室氣氛頓時放鬆咗一下。
袁彌昌話香港覺醒 葉太：指B女瞓醒
修例引起廣泛爭議，Eunice老公、同屬新民黨嘅政策總裁袁彌昌，日前喺facebook上載一幅反修例遊行人山人海嘅相片，形容「香港再覺醒」，引起唔少人討論。黨主席葉劉淑儀噚日陪Eunice見記者時，講笑話袁彌昌呢句意思係B女「瞓覺醒咗」喎。
另外，早前話「一到找數，個個都身患絕症」嘅民建聯何俊賢噚日喺會議中途，同上次會議被逐離場嘅工聯會郭偉强一齊出咗會議室，喺出面邊休息邊睇會議直播。
免講錯嘢被趕 郭偉强何俊賢出會議室
郭偉强話，佢同何俊賢「一糊塗就講錯嘢，又會畀人趕」，所以坐住外面先，何俊賢就諷刺主持會議嘅涂謹申「拿住支雞毛」。
更多港聞
【明報專訊】近幾日發生多宗涉及病弱人士照顧者嘅慘案，今日開始接任社區投資共享基金主席嘅恒隆地產集團傳訊及投資者關係董事關則輝（CF）同Emi...
詳情
【明報專訊】《逃犯條例》修訂掀社會爭議，前立法會議員、新思維創黨主席狄志遠雖不在議會，但佢話仍關心政治，同民主黨中人、某啲建制派都仲有聯繫，...
詳情
相關新聞
