議員訪上海新天地 羅康瑞夫婦請食飯
【明報專訊】立法會長三角考察團嘅大部分行程,記者都可以參與,不過前晚佢哋考察上海新天地呢個飲食消閒區,就不設傳媒採訪安排,究竟佢哋考察咗啲乜嘢呢?原來,有份投資發展上海新天地嘅瑞安集團主席、貿發局主席羅康瑞,同太太朱玲玲當日一盡地主之誼,喺一間酒吧餐廳入面招待考察團。
酒吧餐廳招待
一班議員當然唔少得同兩人合照啦,女士們當然要同「最美麗港姐」朱玲玲影相留念,民建聯葛珮帆(EQ)喺facebook話羅康瑞夫婦向考察團介紹新天地呢個旅遊熱點。唔少議員笑住話,其實本身都已經好熟新天地呢個地方。
另外,隨團嘅政制及內地事務局長聶德權喺新天地請工聯會麥美娟、何啟明,民建聯梁志祥等議員食雪糕,局長影相時更展示佢係用手機支付系統畀錢㗎。
夜遊黃浦江 同楊偉雄慶生
一眾議員晚宴後上船夜遊黃浦江,原來噚日係創科局長楊偉雄嘅生日,議員亦喺船上為楊局長慶祝、畀個驚喜佢。
EQ話局長上年生日時就同議員一齊喺大灣區考察,今年又一齊去長三角,唔知下年仲係咪同議員一齊過生日呢?