參觀中環灣仔繞道 議員影唔到金蛋

立法會交通事務委員會同部分立法會議員噚日視察中環灣仔繞道，聽工程人員講解工程最新情况。繞道早前被揭漏水，路政署表示工程團隊已妥善修補。（立法會圖片）

【明報專訊】造價逾360億元、長4.5公里嘅中環灣仔繞道本月20日第一階段通車。立法會交通事務委員會同港島各區議會議員，噚日分別視察工程最新情况。

毛孟靜彈未開張天花已破舊

立法會議員謝偉銓希望繞道開通後，能夠紓緩香港島主要幹道多年嚴重塞車問題，同時令三隧分流做得更好，但今次視察未影到「金蛋」。呢隻「金蛋」其實係繞道嘅排風口「搖曳風帆」，早前政府推出咗宣傳片介紹，係繞道引入嘅本港首個行車隧道空氣淨化系統。

繞道早前被揭漏水，路政署表示工程團隊已妥善修補。民主派會議召集人毛孟靜就喺facebook上載短片，話未開張天花就已覺破舊；灣仔區議員楊雪盈做live，帶大家睇早前滲水位置，工程人員表示已喺有裂痕嘅地方鑽洞，再注膠封密裂痕，水就唔會滲出。

陳學鋒實測油街去中環4分鐘

民建聯中西區議員陳學鋒就拍咗段片實測，用中環灣仔繞道由炮台山油街去中環要幾耐，原來只係要約4分鐘咋！