房協主席陳家樂「過試用期」

房協喺fb上載主席陳家樂上任百日感言，佢笑言自己「算係過咗試用期」，連fb小編都話佢真風趣。（房協片段截圖）

【明報專訊】陳家樂(Walter)今年9月接替退任嘅鄔滿海出任房協主席，唔經唔覺已上任100日，房協嘅facebook小編話要幫Walter搞百日宴慶祝，於是同Walter拍咗條片，順便訪問佢嘅上任百日感言。Walter喺片段笑言，房協一直好慳家，唔使搞百日宴啦，仲話自己「亦算係過咗試用期」。佢話上任後見過唔少團體同議員，又去咗唔少飯局，「最有價值梗係唔係食嘅部分，最重要係大家交換咗唔少意見」。

近年房協工作接踵而來，既要應政府邀請委託顧問研究郊野公園邊陲發展嘅可行性，又要處理屋邨開始老化嘅問題，Walter上任後話過有三大工作方向，分別透過長者屋、舊邨重建、過渡房屋貢獻香港。佢話主席工作唔容易，老實講其實係幾吃力，但苦樂參半，呢3個月同行政總裁行過唔少地盤，有啲係重建屋邨，希望房協嘅工作可幫到市民。Walter最後趁住冬至同下周聖誕，預祝市民團團圓圓、聖誕快樂。