議會陣線見特首 毛孟靜話林鄭面黑
[2018.08.31] 發表
【明報專訊】特首林鄭月娥頻頻會見唔同團體諮詢對《施政報告》意見，立法會內嘅激進派「議會陣線」，噚日6個成員一齊去特首辦出席，其中議員陳志全更係首次去特首辦，據聞林太聽到都幾驚訝。不過會上氣氛似乎唔多好，6人見記者時，議員毛孟靜第一句就話林太「態度惡劣」，形容對方「苦情、面黑」，又批評林太對所有政治敏感議題都無回應。
議員區諾軒形容林太一到3點半、即會面結束時間，就話「時間夠」並立即起身走人；朱凱廸就話喺香港政治格局上，反對派去見特首其實係鞏固行政主導，但覺得坦誠交流係值得參加，不過林太「黑口黑面」，對此感到不是味兒、受冒犯。
Emily聽聞林太會上回應得比較多?係陳志全提出性傾向歧視條例等問題，林太席間強調無偏見，又形容自己係務實嘅天主教徒，講番參選特首時提及不排除就同性婚姻合法化諮詢公眾，結果惹嚟團體批評。
港區政協委員噚日亦有見林太，據講約20人喺會上發言，圍繞房屋、土地、青年、23條等議題，Emily聽聞，全國政協常委、長和主席李澤鉅更就房屋議題提建議。據悉有政協發言後，林太特別糾正，大家應該講「內地同香港」而唔係「中國同香港」，形容如果政協都搞唔清呢個概念，恐怕會畀人笑呀。
更多港聞
相關新聞
