3城合體圖案 高鐵郵品下月推出
[2018.08.29] 發表
【明報專訊】高鐵香港段下個月通車，最近為此事忙碌嘅唔止運房局同港鐵，香港郵政噚日宣布，將會喺下個月通車前，推出一套以「廣深港高速鐵路香港段」為題嘅特別郵票及相關集郵品。
特別郵票一共有4張，拍埋一齊可以組成一列高鐵列車造型，由左至右分別代表廣州(2元)、深圳(3.7元)同香港(4.9元及5元)3個城市嘅特色，例如香港有大家好熟悉嘅地標尖沙嘴鐘樓、金紫荊廣場等，仲有魚蛋、缽仔糕、點心等美食。
代表廣州嘅2元郵票亦比較易認，圖案包括「小蠻腰」廣州塔、孫中山紀念館，以及代表飲茶文化嘅茶壺。至於深圳，除咗被稱為「地王大廈」嘅信興廣場，其他都比較抽象，例如郵票上有單車同咪，莫非係鼓勵大家去深圳踩共享單車同唱K？Emily請教過深圳嘅朋友，佢哋都認唔出啲圖案代表乜，而Emily最關注嘅係港鐵車務總監劉天成日前hard sell嘅光明城站「光明三寶」(紅燒乳鴿、牛初乳、甜粟米)，就唔見喺郵票上。
各郵政局喺9月3號會率先推出首日封；17號開始推出一套4張嘅特別郵票、小全張以及套摺，同日亦會發售蓋有高鐵造型特別郵戳嘅首日封。
更多港聞
【明報專訊】唔少議員都趁新一個立法年度未開始前總結年度工作，民建聯立法會議員葛珮帆（EQ）話，上個立法年度佢喺大會提出嘅口頭同書面質詢，夾埋...
詳情
相關新聞
