一周工作70個鐘 政助符傳富話老婆投訴

符傳富（右）工作忙，話每晚都要趕返屋企把握小朋友睡前時間陪吓囡囡。圖為佢月前出相貼文話自己30歲，並總結過去10年大事，包括28歲做老竇。（符傳富facebook圖片）

【明報專訊】電影《逆流大叔》提及經典片《英雄本色》，一時間好多人懷念Mark哥；民建聯立法會議員蔣麗芸(Ann姐)最近訪問咗運輸及房屋局政治助理符傳富(Mark)，仲叫佢做Mark哥，符傳富笑言「叫我Mark仔」就得。符傳富話平均一星期工作70小時(即係如返足7日，每日都要做10個鐘)，做到太太都有投訴，又話個女得1歲幾，所以每晚都要趕返屋企，把握時間多啲陪小朋友。

選區會只努力數月「輸得慘烈」

網上節目《蔣麗芸會客室》搵咗Mark做訪問，大談年輕人生涯規劃。Mark喺大學讀精算，亦有會計師牌，點解會轉跑道從政？佢話大學時發現自己鍾意同人接觸，25歲就加入自由黨。Mark曾參加2013年區議會補選，單張更sell自己係會考8A生，佢形容當時「輸得好慘烈」，指自己向公司拎咗幾個月大假做選舉，但發現地區工作唔係只做幾個月就有成果，敗選但獲益良多，此後喺黨內負責航運交通界嘅工作，直到一年前經黨嘅推薦加入政府。

Mark勉勵年輕人，按興趣行事好重要，話如果早啲知自己嘅興趣，行嘅路可能會唔同。Ann姐亦不忘提及支持政府做多啲中學生生涯規劃嘅工作。

更多港聞

花式足球入學校 義教宣揚不言棄信念

【明報專訊】政府新聞處近日訪問去年成立嘅香港花式足球學校，原來學校為咗令更多學童參與，決定同中、小學合作，開辦收費低廉甚至免費嘅訓練班，畀低... 詳情

小時愛執石頭 大個入土力處

【明報專訊】人人揀選職業都有唔同原因，發展局長黃偉綸噚日發表網誌，由幾個土力工程處見習生分享入行故事，有人形容自己「三歲定八十」，細細個已經... 詳情