馬逢國「髮gel事件」避過休會辯論 黃國健：咁少頭髮仲帶gel

馬逢國「髮gel事件」避過休會辯論黃國健：咁少頭髮仲帶gel

[2018.06.02] 發表

【明報專訊】立法會體育、演藝、文化及出版界議員馬逢國，之前帶?超出規定容量嘅髮型造型啫喱登機，成為城中熱話。公民黨立法會議員譚文豪(Jeremy)去信立法會內務委員會，要求就住呢件事提出休會辯論，建制派最終否決譚文豪嘅動議。泛民同建制派噚日爭論?陣，一度將焦點轉移到馬逢國嘅頭髮量。工聯會議員黃國健(KK)批評泛民提出休會辯論只係「抽水動作」，不過，KK都好認真咁講：「馬逢國最大嘅錯處係，你嘅頭髮咁嘅量，竟然仲堅持帶個髮gel，係無咩必要」。

噚日立法會內會開會討論呢件事，譚文豪開場白時話「法治重要定係髮gel重要？」佢亦明言提出休會辯論唔係針對一個人，而係關注議員唔可以濫用權力，避免香港愈嚟愈禮崩樂壞。馬逢國喺會上再次向受影響嘅保安人員同公眾致歉，又話自己當日喺機場，言語間提及議員身分，同埋機管局行政總裁林天福嘅名，係有不恰當之處。

雙方陣營嘅議員辯論時，不忘提及馬逢國嘅髮量。公民黨郭榮鏗(Dennis)話，事件唔係一個人有無頭髮嘅問題，而係有無品(格)嘅問題。Dennis仲抽水話，黨友楊岳橋從來唔用髮gel，所以頭髮keep得咁好。

建制派議員普遍認為既然馬逢國已經道歉，就唔需要再休會辯論，批評泛民係濫用休會辯論。KK亦都批評泛民抽水，但唔知有意定無意，KK竟然話馬逢國最大錯處係咁嘅髮量，都堅持帶髮gel。唔少議員起哄大笑，連主持會議嘅民建聯李慧琼都笑埋一份。