清潔龍阿德 落區蛇王斷正

【明報專訊】由食物環境衛生署開設嘅「清潔龍阿德」專頁周不時都喺facebook抽水，噚日佢就喺自己個facebook專頁上載一堆靚相，話畀網民「集吓郵」，原來佢早排落區做清潔同執垃圾，仲同市民踢波𠻹。

政府唔同部門𠵱家都有開facebook，唔同部門仲識互相欣賞同抽大家水，好似天文台噚日開Fb，清潔龍阿德率先留言話「清潔無論任何天氣」，天文台就快速回應「 全情投入來愛你」，而警隊fb都加一句留言，話「小編都係香港天文台fans」。 唔怪得有網民問，佢哋係咪夾定。

講番清潔龍阿德，佢早排落區巡視一下香港街道，見佢噚日上載嘅相，都有拎住啲垃圾膠袋係手，都係想呼籲大家都要保持公園清潔。但睇睇下啲相，先發現清潔龍阿德落區時偷懶，仲被人捉到正影低咗，睇相見佢去咗街場搵啲細路踢波，重有個細路扯住佢條尾走，佢就喺facebook解畫，話係「好好好nice嘅FANS同我一齊做運動」，佢仲問大家佢「型唔型仔」，叫大家留意一下，下次會唔會都可以喺街度捕獲佢咁話。

更多港聞

關懷學生日 九龍公園辦歡樂墟

【明報專訊】近年愈來愈多青少年嘅精神情緒出現問題，「陳校長免費補習天地」創辦人陳葒發起「全城關懷學生行動日」，喺2017年首次將復活節前最後... 詳情

女鐘表學徒獲VTC傑出獎

【明報專訊】職業訓練局（VTC）主辦嘅「 2017年傑出學徒獎勵計劃」前日舉行頒獎禮，做學徒唔一定係男同學，今次獲獎14人包括3個女生，其中... 詳情