【明報專訊】「撲滅罪行，人人有責」呢句話大家唔會陌生，40名市民真係身體力行，見到罪案發生無退縮，仲協助警方破案，噚日獲頒「好市民獎」。喺芸芸得獎者中，Emily最想表揚嘅係今年只有13歲嘅南亞裔中一學生Khan M Hanif，佢唔止係年紀最細嘅得獎者，噚日得獎後仲提到，想證明畀大家知：「唔係全部南亞人都做衰嘢。」Hanif仲話，拎到獎加強咗佢日後做警察嘅信心。

追賊3分鐘 獲獎增做警察信心

Hanif喺上年10月，目睹一個高大過佢好多嘅男人，偷走佢朋友嘅腰包，Hanif就吊住個男人尾追足3分鐘，最後警察趕到截停個男人，佢幫朋友拎番啲財物，個男人就被判盜竊罪成。Hanif話，當時曾經猶豫究竟係追上去定報警就算，但望見個男人逃走，就忍唔住追。Hanif話媽媽都有擔心佢安全，鬧佢無顧自己就去追賊。睇嚟Hanif大個咗都幾有做警察嘅潛質噃。

獲頒「好市民獎」嘅仲有今年62歲嘅劉漢麟，上年5月佢喺粉嶺目擊一個男人，用摺刀割斷女途人手袋肩帶後逃走。有跑開步嘅劉漢麟追足15分鐘，仲一邊跑一邊嗌搶嘢，終於驚動到附近警員加入追截。