【明報專訊】區諾軒代表民主派喺立法會補選港島勝出，Emily噚日報道香港眾志黃之鋒喺facebook撰文，披露當日搵民主黨前主席楊森喺深紅選區(建制區)幫手拉票時，有老友記上前同楊森握手搭膊頭，令之鋒「相當震撼 」；Emily就此請教楊森，楊森話黃之鋒等人喺選前10多日先搵佢幫手，「可能佢哋想用自己嘅方法去選，但比例代表制同單議席單票制唔同，只靠羅冠聰嘅票唔夠贏」。

早叮囑黨友為區諾軒拉票

楊森憶述一早叮囑民主黨港島區兄弟要主動幫區諾軒拉票，一來區本來係民主黨人，二來為大局着想，希望民主黨樁腳全力以赴，唔好輸咗議席。直至選前10多天，佢先收到黃之鋒嘅要求，問佢可唔可以陪區去石排灣「派早餐(即吃早餐上班時段派單張)」。楊森一口答應，朝早7點就同區諾軒一齊派咗兩個鐘。楊森坦言呢區唔係民主派地頭，但佢派單張時，確實有街坊識佢，同佢打招呼，「楊議員，你來幫手呀？好耐無見喎」。

首日派單張反應好，黃之鋒請楊森派多次，楊森建議選前嘅星期五黃昏喺香港仔巴士總站派單張及「嗌咪」，等多啲人聽到。楊森話黃昏開始有居民收工及轉車，一舉數得，佢講嘅全部係傳統直選老手嘅意見。

證地區工作有回報

點解紅區都會遇到粉絲？楊森話當年黃竹坑邨重建，並要拆徙置區，他為居民開大會，要求政府原區安置，呢啲街坊部分人搬去石排灣，「十多年後佢哋仍認得我，因為我幫過他們」。楊森話，呢啲正正反映地區工作、服務街坊係有回報，支持係要靠服務編織出嚟，並且可細水長流。