【明報專訊】唔少立法會議員趁農曆新年假期外遊，當中唔少人去咗日本。經民聯林健鋒(Jeffrey)同太太及囝囝三個去咗東京自由行5日，而平時有車代步嘅Jeffrey，話自己係東京地膽，去到都係平民遊搭地鐵，話搭地鐵仲方便，而且平好多。

Jeffrey話揀酒店都會搵近地鐵站，話搭幾個站就可以去餐廳搵食。佢話以前去日本，地鐵車程只需要15分鐘，佢試過搭的士，因為塞車要用40分鐘，而的士費要300幾港元，搭地鐵呢，十幾蚊就搞掂。Jeffrey仲話日本人好鍾意打機，喺列車上唔少人都係低頭族，不停撳手機玩遊戲。

Jeffrey個仔林凱章，兩年前被人影到同前主播周嘉儀把臂同遊台北，Jeffrey噚日同傳媒聚會，被問到阿仔有無帶女朋友返屋企拜年，佢就話唔講囝囝嘅事，講笑話阿仔好多女性朋友，但目前係單身，同家人一齊住喎。