年宵埋身 周庭踩陳家珮場 她贈「芳蹤杳然」 她勸「回頭是岸」
【明報專訊】維園年宵成為3月立法會補選各候選人嘅拉票平台,參選港島區補選嘅新民黨陳家珮噚日現身新民黨維園年宵攤檔,即遭到早前被取消參加港島補選資格嘅香港眾志周庭「踩場」。香港眾志喺維園都開咗年宵檔,周庭著住眾志出品、諷刺建制派喺議事廳瞓覺嘅「早唞啦你」字樣圍裙出現,仲送咗「旗海飄揚」、「芳蹤杳然」揮春畀陳家珮,諷刺佢啲街站「人影唔多見」,只識搵前高官同權貴拍片。陳家珮就反駁話港島好大,難以分身,又認為選民眼睛雪亮,知道邊個做實事。
二人交鋒過後,大家都好客氣。陳家珮就話中國人希望一團和氣,並送周庭「福」字揮春,話「希望你可以回頭是岸」;周庭亦祝陳家珮嘅囝囝快高長大、身體健康。陳家珮話,新年願望係順利當選,可以帶理性聲音入立法會。
區諾軒范國威年宵唱歌
參選新東補選嘅工聯會鄧家彪噚日就同新當選港區人代嘅鄺美雲喺沙田行年宵,愛狗之人鄺美雲仲買咗多個狗狗公仔。而泛民港島候選人區諾軒、新界東候選人范國威,噚晚都趁情人節現身維園民主黨嘅年宵攤檔,大開金口唱歌。佢哋兩個揀咗首歌合唱,不過就唔係唱情歌,而係唱有啲慘情嘅《富士山下》,范國威仲大爆,原來區太喺旁邊一直觀察住㗎。新界東補選候選人仲有陳玉娥、黃成智、方國珊、趙佩玉;港島補選候選人仲有伍廸希同任亮憲。