廣福義祠外牆新裝 展傷健藝術家作品

東華三院舊年起復修廣福義祠，包括「活化」祠廟外牆為社區藝術品（左圖），但新設計就被唔少網民批評話格格不入。小圖為舊貌（資料圖片）

【明報專訊】位於上環太平山街、俗稱「百姓廟」嘅廣福義祠，有超過100年歷史，係東華三院發源地，亦係本港少數供奉亡魂嘅百年古廟，目前列為二級歷史建築。東華三院舊年起復修廣福義祠，包括大規模換樑、修復廟宇內神像等，希望將廣福祠回復到1970年前嘅真實廟貌；同時加入藝術元素，將藝術家嘅剪紙作品鋪貼喺祠廟外牆，活化做社區藝術品，但新設計就引嚟唔少網民批評，紛紛留言話破壞咗原先古廟嘅莊嚴氛圍，覺得唔尊重歷史文化，要求東華三院回復原貌。

廣福義祠未復修前，外牆呈朱紅色，掛住一塊「勝地」牌匾，翻新後近日成為咗社區藝術裝置，牆身有多種顏色，並以一個傷健藝術家嘅剪紙作品，配合同廟宇有關嘅廣東俚語貼喺外牆，包括寫有「神保佑」、「東華三院」、「百姓廟」等字樣。

網上對呢個新搞作有唔少意見。東華三院喺新聞稿介紹話，呢個設計為外牆「改頭換面」，指上環太平山街同荷李活道一帶有濃厚藝術氣息，希望透過廣福義祠嘅新設計，為唔同能力人士提供一個展示藝術嘅平台，會輪流定期展示唔同作品，將傳統文化同藝術結合。東華三院又話，祠廟外牆不屬於已評級歷史建築物範圍內，今次設計唔會對歷史建築物同外牆構成任何破壞，但歡迎公眾表達意見。