【明報專訊】新鴻基地產近年舉辦「公益垂直跑」同埋「香港單車節」，除咗有唔少健兒參賽，仲可以做善事。新地集團執行董事郭基煇噚日就同受惠慈善機構代表同埋受助對象食飯，其間有基層家長話，過去郭基煇多次現身活動同小朋友互動，仲話有次囝囝返到屋企同佢講，「第日大個郭生會請佢去新地返工」，引得全場人大笑。

新地主辦嘅香港單車節，自2015年起就資助小童群益會辦「資優科學創意發展計劃」，呢個計劃會向小三至中二嘅資優基層兒童提供免費STEM課程，過去有150人受惠。有受助對象嘅家長話，因為囝囝有過度活躍而成日被學校投訴，同時唔使點溫書但成日考獲頭3名，令佢唔知點樣教個仔，好彩之後參加呢個計劃，先發掘到阿仔嘅能力，慢慢喜歡學習，令佢放心好多。

家長仲話，估唔到「咁有錢嘅人」會同自己嘅小朋友打成一片，佢話有日囝囝參加完活動返屋企同佢講，第日大個時郭基煇會請佢去新地返工，家長即時打趣問郭基煇係咪真有其事，令全場人捧腹大笑。