【明報專訊】立法會議員毛孟靜(Miss Mo)、陳志全(慢必)、朱凱廸及梁耀忠上月中組成「議會陣線」，聖誕前夕，幾個議員同辦事處職員噚日就開聖誕party開心吓、聯誼一番。今次聖誕party相當環保，議員同議助都自備餐具，Miss Mo更拎返屋企多年嘅聖誕擺設出來佈置，其中有一對睇落仍然好新淨嘅聖誕襪，Miss Mo話其實已用咗超過30年！即使係預備抽獎嘅禮物，佢哋亦響應環保唔用花紙包，部分只用報紙包裝，甚至直接擺出嚟抽。

立會標誌顏色 得慢必答啱

梁耀忠已經離港外遊，而3個議員就畀議員助理「好好招呼」，設計遊戲畀佢哋玩，回答有關立法會嘅問題。雖然3個都係議員，但對於立法會標誌嘅顏色，竟然只得慢必答得啱，至於議會陣線嘅成立日期，就只得阿廸答啱，Miss Mo對自己答錯幾題都非常大反應、顯得難以置信。最終慢必答啱得最多，一眾議助就懲罰輸嘅Miss Mo同阿廸，兩人食一支百力滋，結果兩人商量後決定「用錢解決」，封咗幾封大利市畀議辦同事「找數」。

幾位議員喺抽獎環節亦預備唔少禮物同現金獎，抽晒後Miss Mo即席再拎多1000蚊出嚟抽，慢必亦攞咗早前為港版丹麥女孩拍戲所得嘅1000元片酬出嚟再抽獎，相信助理都皆大歡喜，開心過聖誕。