【明報專訊】立法會上星期通過修改《議事規則》，其中不屬泛民、建制嘅醫學界議員陳沛然投下棄權票，結果醫學界團體「杏林覺醒」同「真普選醫生聯盟」前日就發聲明，話對陳沛然投棄權票「感到極為失望」。聲明話，陳沛然手中嘅即使唔係關鍵一票，唔可以改寫結果，都應該憑良心同專業精神，反對議事規則修改，批評今次關乎大是大非，指陳沛然喺發言時質疑「修改議事規則有違反基本法之嫌」，但就投棄權票，要求對方交代理據。
話自己無揀缺席 積極發聲
陳沛然噚日就喺網上寫文解釋，話自己可以有4個投票選擇，包括反對、棄權、支持、缺席。佢話自己無躲避，反而積極發聲，發言時被人鬧「講廢話」，鬧到上報紙，又為咗投票而缺席香港醫學專科學院畢業典禮。
每出席畢業禮 都被游說支持
陳沛然話，呢3個月內出席好多個醫學學院畢業典禮，每次都有醫生同佢講，話要支持政府同修改議事規則，字眼同語氣更尖銳；又話留意到中大民調，見到近半市民贊成修改議事規則，所以佢投票時喺反對與棄權之間，喺唔影響投票結果大局下，選擇咗棄權。
陳沛然話，如果有業界人士對佢嘅投票意向不滿，佢會誠心接受意見同批評。
;)
