電腦通訊節今開鑼 市民通宵排隊等「搶電腦」

香港電腦通訊節今日喺灣仔會展開幕，場內除咗有唔少科技產品以優惠價出售，仲介紹創新產品，好似呢部結合咗投影機嘅電子白板，只要用手就可以喺投影幕寫字、畫圖案。Emily覺得如果應用喺教學上，相信可以方便教書，學生更易明白抽象嘅內容。（郭慶輝攝）

【明報專訊】一年一度嘅香港電腦通訊節今日起一連4日喺灣仔會展開幕，相信係一眾科技迷嘅入貨良機。Emily噚日去咗電腦節嘅傳媒預覽，見已經有6、7人排隊，佢哋大部分都係想搶到美國智能科技產品商AVITA出售嘅指定型號手提電腦。呢部電腦來頭唔細，機身最薄5毫米，重量1.37公斤，電池耐力可長達10個鐘，AVITA話呢部電腦原價5990蚊，今次只喺開幕日以會場優惠價825蚊賣畀頭10個到佢哋展區嘅市民，難怪有人通宵排隊等買啦。

設VR體驗區自製天文現象

今次電腦節除咗新增「STEM及環保教育主題區」，鼓勵院校交流創科研發成果，仲有VR體驗區設置嘅虛擬教室，參觀市民可以試下用手控制星球，製造月圓、日蝕天文現象。當然唔少得趁住近排嘅電競熱潮，出售電競耳機、鍵盤、滑鼠等專用產品。