記協晚宴上台猛爆金句 薯片胡官談UGL齊呼﹕鼎！

[2017.05.20] 發表

【明報專訊】香港記者協會噚晚舉行49周年晚宴，筵開超過50席，今年除咗邀請咗前特首候選人胡國興到場做主禮嘉賓，仲有另一個前特首候選人曾俊華，兩位對談嗰陣金句齊飛，仲大玩近期熱爆嘅「周浩鼎事件」，佢哋提起個陣，兩個前對手仲一齊異口同聲大叫咗一聲「鼎」，搞到全場笑到收唔到聲。

胡官﹕被告教控方點盤問自己

對於阿鼎用控辯雙方傾案情來比喻佢同特首梁振英私下傾調查UGL事件工作，身為前高院法官嘅胡官就喺對談嗰陣話，今次事件就係被告教控方大狀點盤問自己，全場又再拍爛手掌。

傳媒人曾志豪又問佢哋點睇網上熱傳嘅香港藝人名人做政府職位個幻想圖，薯片叔叔本身對於金管局由丁蟹揸旗就無咩意見，點知胡官就撲出嚟話，丁蟹一做金管局個市就會冧，薯片即刻澄清金管局唔係管股票市場，曾志豪話佢哋好似開咗特首候選人論壇round 2，真係勾起晒Emily做特首選舉嘅回憶。

胡官致辭繼續佢嘅抽水本色，套用今年記協晚會「真相」嘅主題，話如果有人講大話、滿口語言偽術、edit晒啲文件，個心就會愈來愈重，過唔到埃及真理女神嗰關，無得上天堂，惹嚟全場笑聲。

記協主席岑倚蘭致辭再次提到新聞界受真假新聞混淆挑戰，所以更加需要記者，要保護新聞業本身，仲話記協籌得嘅款項，會致力培育新記者。

另外，曾俊華一到場就同啱啱遞辭職信嘅政制及內地事務局副局長陳岳鵬打招呼，兩個人仲密斟咗一陣，陳岳鵬喺嚟緊嘅學年去美國哈佛大學修讀公共行政碩士課程，會成為曾俊華師弟，唔知曾俊華有無傳授啲咩讀書秘笈畀陳岳鵬呢？

更多港聞