【明報專訊】政府喺2015年3月底開始，將長者同殘疾人士嘅兩蚊坐車優惠擴展到綠色專線小巴。政府噚日公布再有多兩條綠色小巴線參加計劃，令長者同殘疾人士可以喺515條綠色小巴線畀兩蚊坐車。今次新增兩條路線包括66S號(由斧山道來往旺角)同99號(如心廣場來往海濱花園)，由今個星期日(2月26日)開始生效。

勞工及福利局長蕭偉強話，自從兩蚊坐車優惠擴展到綠van，𠵱家已經有98%路線參與計劃。

𠵱家仲有兩個路線組別嘅綠色小巴營辦商未參與，政府會盡快同佢哋商討。佢又話，整個公共交通嘅兩蚊坐車優惠，每日有99.79萬人次使用，當中包括87.41萬人次係長者，以及12.38萬人次係殘疾人士，政府預計喺2017/18年度用喺計劃嘅預算達到12億元。