【明報專訊】立法會議員朱凱廸早前同一班義工喺年宵市場回收攤檔剩餘物資，其中元朗小隊嘅義工執到大批有「維他奶」字樣嘅全新風褸同polo shirt。阿廸事後同義工齊齊著住新衫開會，仲將相片上載facebook，留言話：「唔係幫維他奶賣廣告，係話俾大家知貴公司有幾浪費，將有用嘅當成垃圾，又要堆填區埋單。」

當日有份回收物資嘅環保人士日青話，大年初一凌晨喺元朗年宵市場熟食檔發現呢批外套同衫，部分同垃圾混埋一齊，污糟咗嘅有60件，全新嘅有兩箱約50件，另有維他奶字樣帳篷頂。日青估計部分衫係熟食檔人員曾經著嚟做嘢，之後丟咗，佢覺得嘥，所以將部分洗乾淨。

維他奶：已聯絡安排回收

日青又話，事件喺fb曝光後，維他奶方面主動搵佢，解釋話啲衫係熟食檔入貨後公司當贊助畀檔口，佢哋無法控制客戶最終點處理啲衫，但日青唔接受呢個講法。記者噚日問過維他奶公關，佢話上周三已聯絡日青想盡快安排上門攞番啲衫回廠清潔，方便日後再用，𠵱家等緊日青同其他義工商討。

不過，阿廸話呢類公司唔會好認真對待產生廢物嘅問題，所以佢想藉年宵令大家留意多啲，仲話企業咁緊張都係好事，維他奶話因為呢件事想佢哋會面交流處理宣傳品同環境議題。阿廸話其實衫就事小，反而希望可以討論吓生產者責任制，互相了解吓。