【明報專訊】結婚係人生大事，以前嘅皇帝大婚就更加係國家大事，代表一國風範。北京故宮博物院最近借出153組清代文物畀沙田香港文化博物館，名為「宮囍——清帝大婚慶典」嘅展覽今日起至明年2月27日舉行，畀市民了解吓帝王大婚嘅尊貴氣派。

清朝有200幾年歷史，得順治、康熙、同治、光緒4個皇帝登基後先納后，同佢哋有關嘅153組大婚文物，好似金龍紐「皇后之寶」印章、金雙喜如意、白玉合巹杯、滿族嫁娶用嘅多穆壺，同光緒大婚時著嘅雙喜金龍紋袍服等等，體現融合咗中原傳統禮儀同滿族習俗嘅皇帝大婚禮儀；今次仲第一次喺香港展出兩冊《載湉大婚典禮全圖冊》，描繪咗光緒皇帝迎娶隆裕皇后嘅過程，睇到當年皇帝大婚有幾隆重。

前日發表「臨別贈言」嘅政務司長林鄭月娥去咗展覽開幕禮，佢致辭時提到舊年9月訪問故宮，見證當時康文署同故宮博物院簽訂人員培訓合作意向書，加強雙方合作。林鄭話，故宮博物院有超過180幾萬件藏品，好多時連院長單霽翔都係帶藏品嚟香港時先知道展品嘅「存在」，所以今次展覽係難得機會。