KOL推廣名牌篋 最高可獲6000元
【明報專訊】網絡紅人(如KOL,Key Opinion Leader)介紹商品或優惠有「廣告費」,但收入一直都係海鮮價,不過Emily最近就喺一個城中名人手上攞到一張價目表。當中列明若按指定形式,分享推廣網址同埋優惠編碼推銷名牌篋,可獲數千元網上購物金額。當粉絲用優惠編碼購物後,KOL更可獲粉絲消費金額7%嘅佣金。
價目表流出 粉絲消費可再獲佣
嗰個名人就同Emily講,第一次收到如此明碼實價嘅報價單,擔心流出去,令行內推廣收佣嘅「潛規則」曝光,會影響聲譽。嗰張海報由一間KOL中介公司發出,而所列KOL可獲嘅網上購物金額,視乎KOL本身坐擁粉絲數量而定,少於1萬名粉絲會獲1000蚊,及至5萬名粉絲會獲6000蚊。
負責人:非欺騙 三贏方案
接過數以百計推廣工作嘅項明生話,未聽過用呢個方式運作,佢話嗰個計劃以粉絲人數決定KOL價值,會無視粉絲質素,未必有商業效益。發出該邀請海報嘅負責人就回應Emily,指邀請只私下寄畀KOL,唔會公開,而KOL分享優惠,可以列明係廣告或推廣活動,而KOL粉絲用優惠編碼購物可享九折,無欺騙成分,係三贏方案。