【明報專訊】人稱「展大俠」嘅警察公共關係科(PPRB)阿頭區展秋，下星期一開始就同元朗警區指揮官霍樂生對調身分，由霍sir接掌PPRB。霍sir就同Emily講笑咁話，自己以前無睇開新聞，𠵱家即刻下載晒所有新聞App，又話自己凌晨都覆call，歡迎傳媒搵佢幫手。

52歲嘅霍樂生加入警隊28年，一半時間都係主責刑事情報，偵緝經驗豐富，仲做過毒品調查科行動組警司、行動部高級警司(特別職務)，過去年幾時間就留喺元朗。做開情報蒐集，慣咗「密密實實」嘅霍sir話，自己雖然無傳媒聯絡經驗，但會勇於接受新挑戰，喺「機密」同「公眾資訊」之間作平衡。

原來霍sir喺1998年偕同袍偵破咗一單160公斤「冰」毒案，係當時最大宗冰毒案，並瓦解咗犯罪集團，印象深刻。講到上任有咩挑戰？霍sir話，原本預咗出年3月特首選舉同回歸20周年活動嘅重頭戰，但最近出現立法會宣誓風波，被取消資格嘅議員有無進一步行動？佢話自己都睇緊啲。

警隊facebook近期人氣強勁，PPRB都乘勝追擊，開Instagram帳戶，希望多啲年輕人同女性喺社交媒體留意警隊資訊。