【明報專訊】大律師公會主席譚允芝因釋法成為被追訪紅人，佢前日回應釋法時話「如果令本港法律更清楚的話，(釋法)未必是一件不好的事」，呢番言論喺法律界引起迴響，仲有人質疑大律師公會係咪立場有變。譚允芝噚日喺facebook澄清，指大家可能睇咗整篇報道中切割出來嘅分散報道，以及未了解各報道嘅時序同事實發展嘅關係，強調公會立場絕對無轉變。

譚允芝前日嘅言論，連工聯會鄧家彪都喺fb讚好，仲留言話「唔係我地講，而係大律師公會主席譚允芝女士講。譚主席不止於專業，還貼地氣，講出普通市民的心聲」。

話釋法無直接觸及官司

譚允芝噚日再接受電視台訪問，之後再接受記者「扑咪」，而佢就喺fb解畫，仲附上噚日最新訪問片段，話呢段錄影後段有較詳細解釋。佢話公會喺估計釋法會發生前，曾發出聲明強烈呼籲全國人大常委以最克制嘅態度，處理當前極為敏感並具關鍵性嘅事件。但後來知道釋法範圍係限於基本法104條，即何謂一個合格嘅宣誓，而非司法覆核案件中嘅爭議點，即係立法會主席嘅法權同法庭推翻立會主席裁決嘅權力，因此佢認為釋法對官司嘅影響比預期中細，而釋法亦非直接觸及司法覆核官司。

法政匯思﹕一定唔會保持沉默

不過，另一法律界組織「法政匯思」就話，近日收到業界內外朋友詢問，究竟組織對譚允芝就人大釋法嘅言論有咩回應。法政匯思叫大家放心，話佢哋一定唔會保持沉默，會喺釋法內容頒布後，盡快將意見書草擬、翻譯，希望喺星期二發表，仲預告「我們的分析一定不會少了譚女士言論的某些內容」，但強調會對事不對人。