【明報專訊】天水圍一度被標籤成「悲情城市」，一班有心人就希望將天水圍變成一個藝術社區。基督教女青年會(女青)聚集咗一班天水圍街坊、學生同藝術人員，將會帶同多項創意物品，喺聽日嘅「天水藝墟」活動同大家見面。

其中一名參展人梁聲馳(星矢)本身喺天水圍開咗間小店，專賣自家製小精品同擺設，「咁多年嚟，天水圍不斷轉變緊，𠵱家大家勇於表達自己嘅情感同想法，無咁多唔開心，我覺得變咗做藝術社區！」

教製手工匙扣 有以物易物地攤

星矢本身從事廣告創作，佢同女友都喺天水圍長大，兩人上年喺澳洲工作假期時接觸到壓花、盆景等手工技藝，開始萌生出以藝術創業嘅念頭，回港後先喺天水圍嘅格仔舖擺賣，發現街坊對手工藝品有一定興趣，又試過喺除夕前兩日於流動攤位賣貨，同樣受歡迎。

負責天水藝墟嘅女青社工陳憬樟話，天水圍區有好多好似星矢咁有心嘅街坊，佢哋希望擁有一個社區平台，實踐社區資源共享，以手藝技術喺天水圍創造一個永續社區，重塑社區生活嘅人情味。

今次藝墟會有手工匙扣製作班、以物易物地攤、街坊書櫃等等，有興趣市民可於周六下晝3點至5點到置富嘉湖(銀座)二期大堂參與。