新丁遊立會興致勃勃 好奇記者室頭盔 陳沛然即試戴

立法會秘書處職員（前）噚日向一眾議會新丁介紹會議廳內「玄機」，事關會議廳黑色玻璃後面都係攝影房間，所以新丁上任後開會，相信都要打醒十二分精神喇。（李紹昌攝）

一眾議會新丁第一次踏足立法會大樓記者室都表現興奮，又好奇點解會有頭盔，醫學界陳沛然（左四）貪得意戴埋上頭；其實呢啲頭盔係記者採訪裝備之一。（渠贇攝）

【明報專訊】立法會秘書處為議會新丁舉行嘅一連3日「迎新營」，噚日終於到最後一堂，就係帶住議員遊立法會。唔少新丁都好似參加「鴨仔團」咁興致勃勃，對立法會新大樓內部設施好有興趣。

議員第一站先到記者室參觀，幾個民建聯新丁驚奇發現記者室裏面放住頭盔，仲問有咩用。在場記者就解答，呢啲係報道佔領運動時嘅裝備，醫學界陳沛然仲貪得意即場試戴𠻹。

鄺神預告寫《CY落台》

立法會圖書館就設有「議員特藏」呢欄。但呢批新丁裏面，都有唔少人係高產作家，尤其係有「愛情小說作家」頭銜嘅民主黨鄺俊宇。唔知如果佢嘅書全部上晒架，會唔會迫爆個書架？圖書館職員就解釋，一般佢哋會揀同香港時事、人物有關嘅書。鄺神笑住預告，話自己下一本著作會係《有一種幸福，CY落台》。

參觀嗰陣，新丁仲有機會試吓可升降咪兜，同試坐觀眾席。不過有一樣嘢大家都唔夠膽試，就係一樓大堂新增嘅「仿真」主席位同議員座。本來呢個係畀公眾人士影相留念，不過噚日就無新丁敢坐上去扮主席，民建聯周浩鼎就笑住推咗，「我未夠40歲呀」。

更多港聞

何君堯﹕涂謹申係民主黨法律界「死剩種」

【明報專訊】新任立法會議員何君堯嘅言論不時畀人話惹火，佢噚日出席「香港發展論壇」有關立法會嘅研討會，話傳媒需要「sound bite（搶耳句... 詳情

「收到國家指示」 新思維前成員參選特首

【明報專訊】下屆特首選戰已經有人宣布參選！不過咁爆炸嘅新聞，就無咩人報，只係得《成報》噚日有報道。宣布參選嘅人叫邱勛（圖），係新思維前成員，... 詳情

長毛買咖啡 店員紙杯畫心支持

【明報專訊】社民連立法會議員梁國雄（長毛）6月畀廉署告公職人員行為失當，單案噚日喺區域法院預審。長毛行入法庭之前，興高采烈拎住個咖啡杯畀Em... 詳情

卿姐告別25年議員辦

【明報專訊】民主黨主席劉慧卿（中）正式結束25年立法會（包括立法局）議員生涯，噚日佢將由1991年開始用嘅沙田議員辦事處交還畀房屋署，仲同街... 詳情