海濱聽晚搞盂蘭跑 打破死亡忌諱

【明報專訊】維港海濱係唔少人休息閒逛嘅好地方，發展局長陳茂波噚日喺網誌話，希望將維港海濱打造為市民享受嘅地方，而剩番呢半個月暑假維港海濱有唔少活動，包括聽晚首次舉行嘅「盂蘭跑」。

「盂蘭跑」喺聽晚7至9點舉行，參加者沿途會經過中西區多個同生死文化相關嘅地方，例如廣福義祠、東華義莊、贊育醫院、壽衣店、紙紮舖等，主辦機構希望透過將跑步、社區認識同「生死教育」串連起嚟，打破市民對死亡嘅忌諱。

除咗跑步，陳茂波話，今年暑假喺中環海濱嘅「中環夏誌」展出9件哥倫比亞藝術家博特羅(Fernando Botero)嘅大型雕塑，主辦團體亦喺中環海濱加入涼亭、躺椅等休憩設施，仲提供乒乓球、羽毛球等畀市民享用；而呢個周末，西九文化區亦會舉辦本地戶外音樂節等。佢話維港海濱係市民嘅海濱，政府願景係將維港海濱變成市民可以各自享受嘅地方。