國家隊金牌運動員26號訪港 霍啟剛想請埋傅園慧
[2016.08.12] 發表
【明報專訊】香港奧運代表團團長霍啟剛透露，國家隊金牌運動員如乒乓球、羽毛球、跳水等代表，將會喺今個月底訪港3日，作親善訪問同示範表演。至於憑鬼馬表情而紅爆國內外嘅銅牌泳手、「洪荒少女」傅園慧，有無機會一齊來港？霍啟剛話已經向中國奧委會提出，希望可邀請傅園慧訪港。
民政事務局證實，港協暨奧委會已邀請參與今屆奧運嘅國家隊金牌運動員，喺奧運閉幕後訪港。
「洪荒之力」英媒譯mystic energy
傅園慧因為表情多多、兼爆出一句「我已使出洪荒之力」而紅遍兩岸三地及外國，美國《赫芬頓郵報》甚至形容佢係巴西奧運最可愛嘅運動員。英國廣播公司(BBC)、澳洲「news.com.au」同央視英語頻道都有傅園慧嘅報道。不過，「洪荒之力」嘅翻譯考起一眾外媒。英國《衛報》翻譯做「mystic energy」，即「神秘嘅能量」。
仍然身處巴西嘅霍啟剛噚日接受港台《千禧年代》訪問時話，早前向中國奧委會提出邀請國家隊運動員來港，已獲對方回覆，落實國家隊金牌運動員本月26至28日來港訪問3日。
至於爆紅嘅傅園慧會否隨團來港，霍啟剛話，佢都有留意傅園慧嘅報道，覺得佢表情豐富好可愛，但如果金銀銅牌選手都嚟，人數會好多，最終要尊重中國奧委會決定派咩運動員來訪，亦要視乎運動員嘅時間而定，而以往做法都係安排金牌選手來港。
更多港聞
年輕人對國家隊冇咁熱情？ 蔡若蓮：歐洲恐襲分散注意力
【明報專訊】今屆里約奧運，中國隊較預期失落幾面金牌，詎料唔少網民為此感到開心，有人仲話後生仔對中國隊嘅支持，已無2008年北京奧運嗰時咁熱情... 詳情
建制派視民主思路同路人？ 黃梓謙：「黃色指數」肯定唔係零
【明報專訊】立法會選舉將近，唔少有政治立場嘅facebook專頁都開始為選舉造勢。「一人一簽名支持反佔中」專頁就圖文並茂港島候選人名單，仲為... 詳情
相關新聞
