趁脫歐入市田少買英國樓收租

【明報專訊】英國脫歐公投噚日塵埃落定，結果令唔少人跌眼鏡，亦對全球金融市場帶嚟震盪，但自由黨榮譽主席田北俊(田少)就有唔同睇法，形容呢次係「入市良機」。田少講緊嘅唔係香港股市，而係英國樓市，事關田少原來喺英國有物業投資以收租為主，佢話雖然預計租客會少咗，但以長遠投資計，𠵱家就可以喺當地「掃貨」趁低吸納物業。

身兼國際關係學者嘅公民黨陳家洛噚日喺立法會分析英國脫歐前因後果，Emily當然關心埋喺地球另一邊嘅香港，近年港獨思潮興起，Emily就問家洛如果香港都搞個「Hong Kong Exit」公投，脫或留邊一面會多啲支持者呢？家洛無正面答，講笑話「你要問(香港)眾志喎！」

家洛噚日提到，英國留歐失敗嘅話首相卡梅倫一定會落台，點知講完冇幾分鐘卡梅倫就宣布會喺10月辭職，令一眾記者都話非常巧合。

其實唔少商界議員都對結果感到意外，因為當地民調早前預計正反陣營會叮噹馬頭，最終脫歐票數多過留歐逾120萬。力撐留歐嘅經民聯林健鋒，大嘆「民調只能信一半」，佢建議小投資者「一動不如一靜」，最好冷靜睇下各方反應先。金融界吳亮星就話，相信英國脫歐對香港影響輕微，而大型金融機構亦一早有晒準備，但自己都對呢次結果有啲意外。

更多港聞

馮康寶貝女為民主思路助選

【明報專訊】民主思路噚日舉行記者會，公布未來10年香港政策藍圖，新界東聯網前總監馮康嘅寶貝女馮海容（Elizabeth，圖）都有現身幫手。原... 詳情

施榮懷細仔 小鮮肉派傳單

【明報專訊】呢幾日香港持續高溫，正午烈日當頭，企耐啲都一身汗、好易中暑。不過Emily噚日喺中環街頭遇見中華廠商會永遠名譽會長施榮懷個細仔施... 詳情