梁天琦申報75萬選舉開支 計埋旺角衝突夜食M記買水

梁天琦申報75萬選舉開支計埋旺角衝突夜食M記買水

[2016.05.07] 發表

【明報專訊】年初一爆發嘅旺角衝突早已過去，喺衝突中被捕嘅本土民主前線梁天琦新界東補選開支噚日曝光。梁天琦當晚到場支援小販，向警方宣稱發起選舉活動。睇番佢向選舉事務處嘅開支申報(見表)，佢年初一晚7點幾喺土瓜灣「豪食」900蚊麥當勞後，凌晨喺旺角砵蘭街便利店買咗超過200蚊嘅礦泉水。衝突前一日佢就一次過買咗3部Samsung Galaxy Ace廉價手提電話，申報900蚊，當晚仲通宵達旦，去到年初一凌晨4點買咗麥當勞及大量飲品。

根據選舉活動指引，得票5%嘅候選人就拎得番資助，亦即係話呢啲疑似用喺旺角衝突嘅物資費用，最後可能係由政府埋單。不過政府仲審批緊候選人開支，未知最後會唔會批。梁天琦另有幾項特別開支，例如搵環保回收公司銷毁咗140箱文件，花費1400蚊，又幾次購買電油等。

選後「踐諾」慶功 8500蚊食大餐

梁天琦整個補選花費咗大約75.2萬，不過令人驚訝嘅係「代理人及選舉助理開支」竟然係0蚊，亦即係所有助選團都係義務做嘢，一蚊人工都無收。不過梁天琦都有善待班義工，喺選舉過後大搞慶功宴，用咗8500蚊食大餐。雖然屬於選後開支，不過梁天琦都當做選舉開支申請，列明原因係「履行對選舉義工的承諾」。

梁天琦「吸金」能力強勁，收到逾51萬捐款，其中短短1個月，1000蚊以下小額捐款收到7萬幾。最大筆捐款來自「Lam Aileen」，捐咗18萬，「劉可恩」金主就捐咗15萬。普羅政治學苑亦提供咗9萬幾蚊義務服務，包括網上節目廣告等。