【明報專訊】想入政府做學位或專業程度公務員職位，必須通過綜合招聘考試(CRE)同應考基本法試，機會嚟啦，呢兩個試將分別喺6月11同18日舉行，今日開始報名，4月14日下午5點截止。如果想做政務主任(AO)或者行政主任(EO)，之後仲要考埋聯合招聘考試(JRE)，AO同EO位爭崩頭㗎，2013年就分別有485人同166人爭一個位，政府為年輕人而設嘅youth.gov.hk就製作咗條短片，揾過來人講應試心得，仲爆埋以前試題畀大家做貼士。 短片揾咗3個前考生分享，佢哋當年應考嘅英文題，分別要求討論女丁權、係咪應回購領匯(今日嘅領展)等；中文卷就要求討論係咪應該建賭場、民宿等。其中一個前考生話，應試前用咗半年準備，成日睇新聞同評論，了解各議題嘅正反觀點，又會上網了解其他國家同城市嘅資訊。 另一前考生就話，當年應考時引用咗佢喺台灣住民宿嘅經驗去討論香港係咪應該起民宿，佢仲話分配時間好重要，有啲人用晒時間嚟做英文卷，唔夠時間做中文卷，所以佢當年做英文卷時見時間唔夠，就放棄再寫其他觀點，轉戰中文卷。 政府新聞網facebook嘅「小編」噚日發帖文話，「想同小編做同事？首先要報CRE！」截至夜晚10點換嚟59個like同31個嬲嬲，有網民留言「邊個想同689做同事？」 想知應考貼士，可瀏覽政府新聞網fb，佢哋仲搞咗個「綜合招聘考試概覽」答題遊戲，有機會贏部iPad㗎。
|
| |
| |
;)
