麥當勞公關阿頭﹕最驚做收銀
[2016.02.13] 發表
【明報專訊】麥當勞企業傳訊高級總監林婉梅(Wendy，圖)舊年底去分店做實習，學拉花、收銀等，體驗前線工作。佢話過程中最驚做收銀，因為點餐要快手，但收銀機上有成幾十款食物，自己要花啲時間先可以搵啱個掣點餐，壓力都唔細。Wendy上完雞精班，覺得唔同崗位都好有學問。
做過消委會副總幹事嘅Wendy，就住食物用抗生素問題同消委會開會。美國麥當勞舊年宣布停用人類抗生素養嘅雞，Wendy話香港麥當勞供應嘅食用動物，即使用抗生素都只限醫療用途，唔會用嚟催生，而且有停藥期。佢話香港麥當勞都想緊貼美國做法，但當中涉及動物用抗生素喺市場發展情况、農場等問題，需時跟進。
下周一員工產品換新裝
另外，下星期一(15日)起買麥當勞套餐，可以免費將薯條轉粟米杯，唔使加4蚊。麥當勞前線員工制服亦會換上粉紅、藍、黃、綠色4款T-shirt，飲品杯同外賣紙袋都一齊換新裝。
更多港聞
相關新聞
