【明報專訊】區議會選舉上周日結束，參選人都趁住過去一星期喺區內謝票。以246票之差落敗嘅青年新政成員黎耀駿，於大角嘴埃華街嘅宣傳橫額上亦貼咗「感謝支持」，話「對不起，輸了。我們不會放棄！」。有街坊見到，親筆寫信貼喺橫額上打氣，「係大角嘴的居民辜負你……不是你欠246票，係每位大角嘴居民都欠您一票。」信中又感謝黎耀駿畀佢哋選擇嘅權利。黎耀駿隔日即親筆回信，「千萬不要這樣說，票數輸了意味我們還有改善的空間。」

青年新政封好留言免損毁

其後陸續再有人留言，內容有道謝、有鼓勵，宣傳橫額就好似般咸道石牆樹咁變咗留言板，青年新政更派人用膠袋封好留言，以免弄污損毁。雖然橫額總要拆落嚟，但呢種溫情洋溢睇到Emily都好感動，希望每個區議員都咁重視街坊同交流啦。