曾鈺成為新民黨候選人站台 葉劉三個骨褲現身
[2015.11.14] 發表
【明報專訊】區議會選舉候選人做宣傳活動嘅時候，有乜嘢高興得過得到自己黨主席幫手站台，仲要加埋立法會主席助選？今朝返工時間落住毛毛雨，立法會主席曾鈺成就幫新民黨康山選區候選人江玉歡助選，新民黨主席葉劉淑儀仲著住條三個骨褲現身，天氣咁差都得到呢兩大猛人支持，江玉歡認真有面。
江玉歡向Emily話，曾鈺成同葉太今朝企咗超過一粒鐘，叫口號助選，兩個之後都有同佢講加油，佢話對自己同競選團隊好鼓舞。佢又講，今個月競選團隊得到葉太首肯，主動接觸同邀請民建聯曾鈺成助選，曾鈺成好快答應咗。至於係咩原因令曾主席肯幫手跨黨派助選？江玉歡相信係對方支持有心服務社會嘅人咁話。
有幸得到曾鈺成站台，江玉歡唔想揣測勝算，但話曾主席喺港島受歡迎，希望對方幫自己站台，可以有利自己選情。葉太就話，好多街坊見到曾鈺成親自落嚟康山，「驚訝又雀躍」。江玉歡同區對手為公民黨梁兆新。
更多港聞
相關新聞
